កំពង់ស្ពឺ៖ នាយករដ្ឋមន្ត្រីសម្ដេចធិបតី ហ៊ុន ម៉ាណែត បានលើកឡើងថា សង្គ្រាមមិនមែនផ្ទុះដោយសារតែអាវុធនោះទេតែជាផ្នត់គំនិតរបស់មនុស្សទៅវិញ។
ពិធីសម្ពោធសមិទ្ធផលនានាក្នុងមជ្ឈមណ្ឌលវប្បធម៌ព្រះពុទ្ធសាសនានៅឧទ្យានជាតិព្រះសុរាម្រិត-កុសមៈ «គិរីរម្យ» ព្រឹកថ្ងៃទី៣០ ខែឧសភា ឆ្នាំ២០២៤ សម្ដេចធិបតី ហ៊ុន ម៉ាណែត បានរំលឹកទៅនឹងភាពសាហាវឃោឃៅរបស់របបប្រល័យពូជសាសន៍ ប៉ុល ពត ដែលធ្វើឲ្យកូនហ៊ានសម្លាប់ឪពុកម្ដាយរបស់ខ្លួន គឺកើតឡើងដោយសារផ្នត់គំនិតនេះហើយ។ ក្នុងពេលជាមួយគ្នានេះសម្ដេចធិបតីក៏ជំរុញធ្វើយ៉ាងណាកុំឱ្យកម្ពុជាមានជម្លោះសាសនាឲ្យសោះ ហើយនេះជាអ្វីដែលត្រូវយកចិត្តទុកដាក់ជាពិសេសនូវភាពជ្រុលនិយមផ្នែកសាសនា។
សម្ដេចថា៖ «ទាំងព្រះពុទ្ធសាសនា ទាំងគ្រិស្តសាសនា ទាំងអស់យើងប្រកាន់នូវភាពមិនជ្រុលនិយម»។
សម្ដេចបានកោតសរសើរនៅសាសនាទាំងអស់នៅកម្ពុជាដែលអាចរួមរស់ជាមួយគ្នាដោយសន្តិភាព និងត្រូវប្រកាន់ជំហរបែបនេះតទៅទៀត៕